Bakuna Laban sa RSV sa Panahon ng Pagbubuntis
Ang respiratory syncytial virus, o RSV, ay kadalasang nagdudulot ng banayad na sintomas na parang sipon, ngunit maaari itong magdulot ng matinding sakit sa ilang tao. Malamang na magkasakit ng RSV ang mga batang wala pang 5 taong gulang, at partikular na ang mga sanggol na 6 na buwan pababa. Bawat taon, libu-libong maliliit na bata ang naoospital dahil sa sakit na RSV.
Mayroon na ngayong dalawang paraan para maiwasan ang malubhang sakit na RSV sa mga sanggol: (1) maaari kang magpabakuna sa panahon ng pagbubuntis, o (2) maaaring kumuha ng pagbabakuna para sa iyong sanggol hanggang sa edad na 8 buwan. Hindi nangangailangan ng alinman ang karamihan sa mga sanggol.
Ano ang bakunang ibinibigay sa panahon ng pagbubuntis?
Maaaring kumuha ang mga buntis ng Abrysvo, na ginawa ng Pfizer, isang bakuna laban sa RSV na naaprubahan na para sa mga nasa hustong gulang na higit sa 60. Ibinibigay ang isang dosis ng bakunang ito sa pagitan ng 32 hanggang 36 na linggo ng pagbubuntis sa panahon ng RSV (karaniwan sa Setyembre hanggang Enero). Pinoprotektahan nito ang mga sanggol mula sa araw na sila ay ipinanganak hanggang sa edad na 6 na buwan.
Paano gumagana ang Abrysvo na bakuna laban sa RSV?
Nagdudulot ang bakuna na gumawa ang iyong katawan ng mga antibody laban sa virus. Mga pangunahing bahagi ng immune system ng iyong katawan ang mga antibody. Kumakapit ang mga ito sa mga selulang nahawaan ng RSV at tina-tag ang mga ito para sirain ng iba pang immune cell.
Kapag ibinigay ang bakuna sa panahon ng pagbubuntis, dumadaan ang mga antibody na ginawa sa iyong katawan sa inunan at pumapasok sa daluyan ng dugo ng sanggol. Tumatagal ang prosesong ito ng humigit-kumulang 2 linggo. Sa oras na ipanganak ang iyong sanggol, magkakaroon na siya ng mga antibody para maprotektahan siya laban sa RSV. Tumatagal ang proteksyon nang 6 na buwan.
Gaano kabisa ang Abyrsvo na bakuna laban sa RSV sa pagpigil sa RSV sa mga sanggol?
Ipinapakita ng mga pag-aaral na ang pagbabakuna sa panahon ng pagbubuntis ay:
Nagpapababa sa panganib ng malubhang sakit na RSV sa mga sanggol na hanggang 6 na buwang gulang nang 77%.
Nagpapababa sa mga medikal na pagpapatingin at pagpapaospital dahil sa RSV nang 68%.
Mayroon bang anumang panganib o side effect ang Abyrsvo na bakuna laban sa RSV?
Ang pinakakaraniwang naiulat na mga side effect ay ang pananakit sa bahaging iniksyunan, pananakit ng ulo, pananakit ng kalamnan, at pagduduwal.
Nasubukan na ang bakuna sa ilang libong buntis sa buong mundo at napag-alamang ligtas ito. Sa ilang bansa kung saan ito nasubok, napansin ng mga mananaliksik ang maliit na pagtaas ng panganib ng preterm na panganganak sa mga buntis na nabakunahan kumpara sa mga buntis na hindi nabakunahan. Itinuturing na napakaliit ng pagtaas na ito na maaaring masabing nagkataon lang ito o dulot lang ng iba pang salik, dahil mas mataas na ang bilang ng preterm na panganganak sa mga bansang ito. Walang pagtaas sa bilang ng mga preterm na pagkamatay.
Ano ang ibinibigay na pagbabakuna laban sa RSV para sa mga sanggol?
Tinatawag na Beyfortus ang pagbabakuna laban sa RSV para sa mga sanggol. Direktang naghahatid ng mga anti-RSV na antibody sa daluyan ng dugo ng sanggol ang pagbabakunang ito. Ibinibigay ang iniksyon sa mga sanggol na wala pang 8 buwan na ipinanganak sa panahon o papasok sa kanilang unang panahon ng RSV. Maaaring makakuha ang mga bagong silang na sanggol ng pagbabakuna bago sila umalis sa ospital. Naipakitang napipigilan ng isang dosis ng Beyfortus ang malubhang sakit dulot ng RSV sa mga sanggol na hanggang 5 buwang gulang nang 80%.
Mayroon bang anumang panganib o side effect ang Beyfortus na pagbabakuna laban sa RSV?
Kasama sa maliliit na side effect ang pamumula at pamamaga sa bahaging iniksyunan at banayad na pamamantal. Wala pang naiulat na malubhang side effect.
Aling opsyon ang dapat kong piliin?
Parehong ligtas at mabisang paraan ang bakunang ibinibigay sa panahon ng pagbubuntis at pagbabakuna sa sanggol para maiwasan ang sakit na dulot ng RSV sa mga sanggol. Matutulungan ka ng iyong propesyonal sa pangangalagang pangkalusugan na magpasya kung aling opsyon ang pinakamainam para sa iyo at sa iyong sanggol. Narito ang isang paghahambing ng ilang mahahalagang katotohanan tungkol sa Abrysvo at Beyfortus:
| Abrysvo (Bakuna laban sa RSV na ibinibigay sa panahon ng pagbubuntis) | Beyfortus (Pagbabakuna laban sa RSV na ibinibigay para sa mga sanggol) | |
|---|---|---|
| Para kanino ito? | Mga buntis mula 32 hanggang 36 na linggo ng pagbubuntis sa panahon ng RSV (Setyembre hanggang Enero) | • Mga sanggol na hanggang 8 buwan na papasok sa kanilang unang panahon ng RSV, AT • Mga sanggol at batang may edad 8 – 19 na buwan na papasok sa kanilang ikalawang panahon ng RSV |
| Gaano ito kabisa sa pagpigil sa malubhang sakit na RSV sa mga sanggol? | 77% sa 180 araw | 80% sa 150 araw |
| Ano ang mga side effect? | Pananakit sa bahaging iniksyunan, pananakit ng ulo, pananakit ng kalamnan, pagduduwal, at lagnat | Pamamantal at pananakit ng bahaging iniksyunan |
| Ano ang mga benepisyo? | • Ipapanganak ang iyong sanggol na protektado laban sa RSV dahil mayroon na siya ng mga antibody. • Maaaring magbigay ang Abrysvo ng mas mahusay na proteksyon laban sa mga variant ng RSV kaysa sa Beyfortus. • Binabawasan nito ang bilang ng mga iniksyong nakukuha ng iyong sanggol. • Maaaring may patuloy na proteksyon sa pamamagitan ng pagpapasuso. | • Direktang inihahatid sa daluyan ng dugo ng sanggol ang mga antibody sa pagbabakuna (sa halip na maipasa sa inunan),na maaaring magresulta sa mas malakas na proteksyon. • Maaaring mas tumagal ang proteksyon mula sa pagbabakuna kaysa sa proteksyon mula sa Abrysvo. |
Dahil parehong bago ang mga opsyong ito, maaaring hindi pa mapagpasyahan kung paano babayaran ang bakuna o kung ibibigay ito nang libre ng iyong estado. Mainam na suriin kung saklaw ng iyong insurance ang opsyong gusto mo at kung available ang parehong opsyon sa kung saan ka nakatira.
At saka, dahil maaaring magkaiba sa buong bansa ang panahon ng RSV, maaaring magkaiba sa bawat estado ang mga rekomendasyon tungkol sa kung kailan kukuha ng bakuna o pagbabakuna.
Para sa higit pang impormasyon, tingnan ang mga sumusunod na mapagkukunan:
CDC: RSV Vaccination for Pregnant People
CDC: RSV in Infants and Young Children
MotherToBaby: Respiratory Syncytial Virus (RSV) Vaccine (Abrysvo)
Maiikling Impormasyon sa RSV
Ang respiratory syncytial virus, o RSV, ay karaniwang nagdudulot ng mga banayad na sintomas na gaya ng sa sipon, pero para sa mga bata at sanggol, maaari itong magdulot ng malubhang karamdaman at sa ilang sitwasyon, pagpapaospital.
Para mapigilan ang malubhang sakit na dulot ng RSV sa mga sanggol:
Maaaring tumanggap ang mga taong buntis ng bakuna na Abrysvo sa pagitan ng 32 hanggang 36 na linggo ng pagbubuntis sa panahon ng RSV.
Maaaring tumanggap ang mga sanggol ng bakuna na Beyfortus kung wala pa silang 8 buwang gulang at papasok sila sa kanilang unang panahon ng RSV o nasa 8-19 na buwan sila at papasok sila sa kanilang pangalawang panahon ng RSV.
Ang parehong bakuna ay ligtas at mabisa sa pagpapababa ng panganib ng malubhang karamdaman at pagpapaospital dahil sa RSV sa mga sanggol.
Maaaring nakadepende sa estado ang pagkakaroon ng bawat bakuna. Makipag-usap sa iyong provider ng pangangalagang pangkalusugan para tukuyin kung anong mga opsyon ang mayroon at pinakamainam para sa iyo.
Talasalitaan
Mga Antibody: Mga protinang ginawa ng immune system bilang tugon sa isang sangkap mula sa labas ng katawan, tulad ng isang virus.
Immune System: Ang mga selula at organ na nagpoprotekta sa katawan laban sa mga sangkap mula sa labas ng katawan, tulad ng mga bacteria at virus.
Inunan: Isang espesyal na organ na ginawa ng katawan sa panahon ng pagbubuntis. Pinapayagan nito ang paglipat ng mga sustansya, antibody, at oxygen sa fetus mula sa babae. Gumagawa din ito ng mga hormone na nagpapanatili sa pagbubuntis.
Mga Sanggunian
Centers for Disease Control. RSV Surveillance & Research. Accessed 09/19/2023. https://www.cdc.gov/rsv/research/index.html
Kampmann B, Madhi SA, Munjal I, et al. Bivalent Prefusion F Vaccine in Pregnancy to Prevent RSV Illness in Infants. N Engl J Med. Apr 20 2023;388(16):1451-1464. doi:10.1056/NEJMoa2216480.
McLaughlin JM, Khan F, Schmitt HJ, et al. Respiratory Syncytial Virus-Associated Hospitalization Rates among US Infants: A Systematic Review and Meta-Analysis. J Infect Dis. Mar 15 2022;225(6):1100-1111.
Simoes EAF, Madhi SA, Muller WJ, et al. Efficacy of nirsevimab against respiratory syncytial virus lower respiratory tract infections in preterm and term infants, and pharmacokinetic extrapolation to infants with congenital heart disease and chronic lung disease: a pooled analysis of randomised controlled trials. Lancet Child Adolesc Health. Mar 2023;7(3):180-189. doi:10.1016/S2352-4642(22)00321-2.
Last update: November 2023